BAGUIO CITY – Ad-adalen ti Provincial IATF ti Benguet ti posibilidad a kiddawenda iti nasyonal a gobyerno ti panakaipasidong ti probinsia iti Enhanced Community Quarantine (ECQ) tapnu malapdan ti agtultuloy a panagngato ti kaso ti COVID-19 sadiay.
Patien ni Governor Melchor Diclas a babaen iti nasao nga addang ket in-inot a masolusyonan ti kumarkaro a sitwayson ti COVID-19 iti probinsia.
Kinunana a maipatpatungpalen dagiti naing-inget a pagaladan kabayatan ti General Community Quarantine, ti agdama a community quarantine classification ti Benguet.
Karaman ditoy ti liquor ban nga agpaso inton September 30; 50% capacity dagiti indoor dining services; 30% capacity kadagiti salon ken spa; 30% capacity iti religous gatherings ken panakaipawil ti aniaman a social events, reception dagiti kasar, panagkasangay ken dadduma pay nga okasyon.
Innayonna a saan pay a mapalubusan dagiti indoor sports activities, aktibidad ti lokal ken amin a turista bayat a limitado laeng kadagiti immediate familiy dagiti lamay kadagiti minatay.
Nakiddaw pay kadagiti LGUs ti pananglimitarda iti panaggaraw dagiti umili iti masakopan dagitoy.
Maikalkalikagum metlaeng ti negatibo a resulta ti RT-PCR test kadagiti essential travels dagiti saan a residente ti Benguet a maiparang kadagiti border checkpoints ti probinsia.
