BAGUIO CITY – Im-imbestigaran ti Benguet Provincial Veterinarian Office ti posible a nagtaudan ti African Swine Fever nga agraraira ita sadiay Mankayan, Benguet.
Kasaruno paylaeng daytoy ti panakailista manen ti nasao a municipyo iti kabarbaro a kaso ti nasao a sakit.
Iti panakiyuman ti Bombo Radyo kenni Provincial Veterinarian Officer Miriam Tiongan, kinunana a nagpositibo iti ASF dagiti 44 a taraken a baboy a nagtaud kadagiti dua a barangay.
Manipud iti nasao a bilang, dinakamatna a dua a baboy ti pimmusay ken wallo ti nadepopulate sadiay Barangay Suyoc; tallo met ti natay ken 20 ti nadepopulate sadiay Barangay Bulalacao.
Atapenna nga adda ti nangisursur iti nalaka a presyo ti karne ti baboy a rason a nagwaras ti nasao a sakit ti ayop.
Immunan a nagwaras ti ASF sadiay Mankayan idi laeng napan a bulan no sadinno atapenna iti maysa a paglakoan sadiay Barangay Guinaoang a nagparti ti baboy.
Impetteng ni Tiongan a karaman ita a bambantayan ken iwanwananda ti Barangay Taneg ken Guinaoang a nakailista metlaeng ti kaso ti ASF.
Iti agdama ket saan a maibilang ti municipyo ti Mankayan kas ASF free kalpasan a nailistada ti kabarbaro a kaso ti nasao a sakit.
