BAGUIO CITY – Ad-adalen ita iti mayor ti La Trinidad, Benguet no ipaulogna ti pammilin para iti panakaipatungpal ti 30% wenno skeletal workforce a sistema ti panagtrabaho kadagiti opisina sadiay kagiddan ti panagngato manen ti kaso ti COVID-19 sadiay.
Sigun kenni Mayor Romeo Salda, nakaawat daytoy ti rekomendasyon manipud iti Department of the Interior and Local Government mainaig iti panakaiyemplementar ti skeletal workforce sadiay gapu iti obserbasyon nga umad-adu manen ti kaso iti masakupanna a munisipyo ken gapu metlaeng iti pangta ti Delta variant.
Kinunana nga urayenda ti report ti Municipal Health Office no adda ti panaginnakar a mapaspasamak kadagiti nagduduma nga opisina sadiay sakbay nga ipaulogna ti nasao a pammilin.
Dinakamatna nga iti kanito a masurot ti 30% a capacity kadagiti opisina ket 20-21 laeng nga empleyado ti mapalubusan nga agtrabaho iti innaldaw.
Innayonna a no saanda nga ipatungpal ti nasao a sistema ti panagtrabaho ket limitaranda ti bilang dagiti kliyente nga akomodarenda iti innaldaw.
Kinunana pay nga obserbaranda metlaeng ti transmission rate kadagiti nagduduma nga establishemento sadiay La Trinidad para iti panangirekomendarda iti kapada a sistema ti panagtrabaho.
Iti agdama, agarupen iti 4,300 ti pakabuklan a kaso ti COVID-19 sadiay La Trinidad a pakairamanan dagiti 121 a pimmusay.
