Nasayaat ti kasasaad ti siudad iti Baguio maipapan iti poverty no idilig kadagiti urban poor iti dadduma a lugar agsipud ta adu dagiti mabalin a panggedan dagiti indibidual.
Iti pannakaiuman ti Bombo Radyo kenni Job David J. Manalang, Assistant Regional Director ti Commission on Population and Development – Cordillera, awan ti nailista dagitoy a homeless indibidual iti siudad gapu ta maysa daytoy kadagiti kangrunaan a siudad iti pagilian.
Sigun kenkuana, dakkel a tulong ti panagngato ti employment rate iti 97% gapu ta kaaduan kadagiti agtrabaho ket agturturong iti siudad ti Baguio kasta met iti Tabuk City no sadino agbalbalin metlaeng dagitoy a hotspot a pagmigrate-an iti rehiyon Cordillera.
Malaksid iti dayta, kaaduan metlaeng dagiti agmigmigrate ket edukado, college graduate ken agbirbiruk iti trabaho isu’t gapuna a saan dagitoy a karaman iti maaw-awagan nga urban poor.
Nupay kasta, adda latta dagiti sumagmamano a munisipyo ken barangay nga addaan iti nangato a poverty rate partikular kadagiti sumagmamano a munisipyo ken barangay idiay Abra.
Daytoy ket gapu paylaeng iti kinakurang dagiti oportunidad a mabalin a panggedan dagitoy rason a kaaduan kadagiti nakaturpos ket agturturongda iti dadduma a lugar tapno idiay da a mangged.
Malaksid iti dayta, maysa metlaeng a rason ti kinaadu ti populasyon ken ti metlaeng kinabassit dagiti economic centers sadiay.
Kabayatanna, kinuna ni Cecile Aguilan Basawil, Regional Director ti Commission on Population and Development – Cordillera a maikadua ti siudad ti Baguio nga addaan iti kadakkelan a populasyon iti intero a rehiyon agsipud ta ditoy metlaeng ti sentro a pagsasabatan dagiti indibidual nga agtrabaho ken agmigrate.
Innayonna a maysa metlaeng nga advantages ket gapu iti nalimiis a klima rason nga adu dagiti agturong iti siudad nga agtrabaho.
