BAGUIO CITY – Nainget a bambantayan ita ti pulisa ti presensiya dagiti private army groups (PAGS) iti probinsia ti Abra.
Iti esklusibo a panakiyuman ti Bombo Radyo Baguio kenni Pol. Captain Edwin Sergio, Public Information Officer ti Abra Police Privincial Office, dumanon itan iti 38 ti bilang dagiti PAGS iti nasao a probinsia manipud iti sigud a 118 a nailista idi napalabas a tawen.
Gapu iti daytoy, kinunana a nangipatulod metten ti PNP Cordillera iti kanayunan a 70 a pulis kas augmentation force sadiay Abra.
Kinuna ni Pol. Capt. Sergio nga iwanwanawanda metlaeng dagiti election areas of concern iti nasao a probinsia.
Dinakamatna a kadagiti napalabas nga eleksion ket adda dagiti lugar sadiay Abra a naklasipikar kas green , yellow ken orange nga areas of concern.
Kagiddan iti daytoy, nangipila metten iti Certificate of Candidacy (COC) ti sumagmamano nga agkakabagyan ket prominente a pamilya sadiay Abra.
Karaman dirtoy da Congressman JV Bernos para iti reelection, Incumbent Bangued Mayor Dominic Valera iti kina -gobernador ken incumbent Governor Joy Bernos kas vice governor.
