Pinagyamanan ni Presidente Ferdinand ”Bongbong” Marcos Jr. ni Her Majesty Queen Maxima ti Netherlands gapu iti panangipaayna iti pinansial a tulong iti Pilipinas.
Karaman kadagiti tulong nga inawat ni President Marcos ket dagiti “financial inclusion foundational building blocks”, kas iti “connectivity”, “cybersecurity”, “digitization”, ken “interoperable payments”, sigun iti Presidential Communications Office.
Ni Queen Maxima a nagserbi metlaeng kas United Nations Secretary-General’s Special Advocate for Inclusive Finance for Development (UNSGSA) ket timmulong tapno ad-adda a mapasayaat ti panagkadua ti Pilipinas ken ti pagilian daytoy ken maibinglay dagiti kasayaatan nga addang kasta met a masuportaran ti panagregget a mangpasayaat ti “connectivity”.
Para met kenni President Marcos, adda dagiti “projects” a nakalinya tapno mapasayaat ken mapadur-as ti “internet connectivity” iti Pilipinas.
Impasigurado ni President Marcos a marisut ti nasao a banag.
Ni Queen Maxima ket naayaban iti opisina ti presidente kas paset iti panagbisitana iti Pilipinas manipod Mayo 21 agingga 23 tapno matulungan a maitandudo ti “financial inclusion” ken “financial health”.
Maipalagip a daytoyen ti maikadua a panagbisita ti reyna iti Pilipinas kalpasan a bimmisita daytoy idi tawen 2015 kas Special Advocate.
