Impeksa ni President Ferdinand “Bongbong” Marcos Jr. a ti climate change ken basura ti makagapu nu apay a napasamak ti dakkel a panaglayos idiay National Capital Region idi napalpalabas nga aldaw nga intunda ni bagyo a Carina ken ti habagat.
Malaksid iti dayta, kinuna ni Marcos Jr. kabayatan ti ocular inspectionna kadagiti naapektaran a lugar idiay Metro Manila a dinadael ti maysa a barko ti navigation gate idiay Navotas rason ti panaglayos.
Immuna met a kinuna ti presidente kabayatan ti maikatlo nga State of the Nation Address daytoy nga agarup 5-K a flood control projects ti nakompleto.
Nu pay kasta, iti laksid nga adda dagiti flood control, agbalbaliw met ti klima rason a saan daytoy a makontrol dagiti insidente a panaglayos.
Ado met a senators ti mangkwekwestionar iti kinaepektibo ti flood control measures kasta met ti pondo a nakalatang kadagiti nasao a proyekto.
Daytoy ket tapno mausarda ita a panawen ti panagtutudo.
