Manarimaan a mapagtaltalantanan ti nagduduma a pakaseknan iti Estados Unidos kagiddan ti kaunaan a Presidential Debate da President Joe Biden ken sigud a President Donald Trump idiay Atlanta.
Iti panakiuman ti Bombo Radyo kenni Delfrado Villanueva Jr., Bombo International News Correspondent – California, USA, kinunana a sigud a nagsinango da Biden ken Trump idi tawen 2020 nupay kasta saan a nasayaat ti taray ti nasao a debate gapu ta nagbalin a taktika ni Trump a tunggal agsao ni Biden ket lapdanna daytoy.
Sigun kenni Villanueva Jr., karaman kadagiti isyu a napagtalantananda ket inflation, ti panagngato dagiti gagatangen iti 20% rason a ti ekonomiya ti Estados Unidos ket bumabbaba.
Nupay kasta, impasingkedan ni President Biden nga ar-aramiden amin ti administrasyon daytoy ti kabaelanda tapno mapasaayaaat ti ekonomiya.
Iti sabali a bangir, impeksa ti administrasyon ni Biden a bimmaba ti kaso dagiti krimen iti nasao a pagilian.
Kabayatanna, dagiti daduma pay a pagsaritaan dagitoy ket maipapan iti racism, abosyon, climate change ken daduma pay.
Kinuna ni Villanueva Jr. a ti presidential debate ket mangpadas iti kinasirib ken kinalaing dagiti agngayngayangay iti kina-Presidente idiay Estados Unidos a mapasamak inton Nobyembre ita a tawen.//Bombo Mera Pacpacan
