BAGUIO CITY – Pimmusay ti maysa a lalaki iti napasamak a panagdidinnangran iti junction ti Naguillian Road ken Ferguzon Road ditoy Baguio City idi kalman.
Nabigbig daytoy a ni Ricardo Perez Santiago, 49-anyos, baro, press operator ken tubo ti Lingayen, Pangasinan.
Nabigbig met ti suspek a ni Radcliffe Nidoy Godoy, 35-anyos, naasawaan, jeepney driver ken tubo ti La Union.
Maibasar iti report ti pulisya, nagturong ni Radcliffe Godoy ken ti kabsatna a taxi driver iti maysa a panganan ti lugaw iti nasao a lugar idi killaat a dinanog ni Radcliffe ni Ricardo iti awan umno a rason.
Nangitunda daytoy iti komosyon a nangitunda iti panagdidinangran dagiti nasao nga indibidual.
Dinanog ni Radcliffe ni Ricardo a nangitunda iti panakatumba ti biktima iti kalsada ken naitama ti ulona iti semento.
Dagus a naitaray ti biktima iti pagagasan ngem saan a nalakasat ti biktima.
Naduktalan pay a nakainum dagitoy iti arak idi napasamak ti komosyon.
Sumangsango ita ti suspek iti kaso a panagdangran ken homicide.
