Bumaba ti presyo ti bagas iti P29 agingga P34 tunggal kilo inton bulan ti Agosto.
Sigun daytoy kenni House Speaker Martin Romualdez.
Iti agdama ket dumandanon iti P50 nga agpangato ti tunggal kilo ti commercial rice idiay Metro Manila.
Sigun kenni Romualdez, nakasaritana ni Philippine Rice Industry Stakeholders Movement founder ken lead convenor Rowena Sadicon kadwada ti co-founder a ni Orly Manuntag ken ti spokesperson ti Grain Retailers Confederation of the Philippines.
Sigun kenkuana, nagkari dagiti nadakamat a grupo nga ipababada ti presyo ti bagas kasaruno ti Executive Order 62 nga inruar ti palasyo a mangimanmandato iti pannakaipababa ti taripa dagiti imported a bagas iti 15% manipud iti sigud a 35%.
Dinakamat pay ni Romualdez nga inton Hulyo ket agay-ayam ti presyo ti well milled rice iti P45 agingga P46 tunggal kilo; premium rice iti P47 agingga P48 tunggal kilo sakbay a magun-od ti P29 agingga P34 tunggal kilo inton Agosto.
Impasigurado met ti nasao nga opisyal kadagiti mannalon ti agtultuloy a suporta ti gobyerno tapno mapangato pay ti apit dagitoy.
