Posible a bumaba iti P20.89 tunggal litro ti presyo ti diesel bayat a ti gasoline ket posible met a bumaba iti P4.43 tunggal litro ken ti kerosene a posible a bumaba iti P8.50 tunggal litro ita a lawas.
Sigun kenni Department of Energy (DOE) Secretary Sharon Garin, dagiti pattapatta a panagbaliw ti presyo ket para iti April 14 (Martes) agingga intun April 20 (Lunes).
Inlawlawag ni Garin a posible a saan nga agpapada ti presyo kadagiti nadumduma a gas station iti pagilian.
Nupay kasta, impanamnamana a ti pattapatta ket roll back ti presyo ti petrolyo ita a lawas.
Kabayatanna, immuna a kinuna ni Garin nga imposible nga agsubli iti P60/L ti presyo ti petrolyo iti pagilian gapu ti structural damage nga intunda ti tension sadiay Middle East.
Innayon daytoy a saan paylaeng a masinunuo no kaano nga agpatingga ti giera, ken posible nga agpaut ti pannakatarimaan dagiti nadadael nga oil-related facilities.
