BAGUIO CITY – Posible a mangrugin inton sumaruno a lawas ti profiling kadagiti indibidual iti probinsia ti Benguet a maipangruna iti libre a bakuna kontra iti COVID-19 nga ipaay ti nasyonal a gobierno.
Sigun kenni Governor Melchor Diclas, dagitoy ket dagiti health workers, frontliners ken senior citizens ken maigiddan iti profiling ti panagsanay dagiti health workers a mangisayangkat ti panagbakuna.
Dinakamat met ti Benguet Provincial Health Office nga awan pay ti partikular a brand ti bakuna a maaramat iti Benguet ken awan ti partikular nga aldaw no kaano a sumangpet dagiti bakuna iti pagilian.
Nupay kasta, inyunay-unay ti provincial government nga agbalin a transparent ti maisayangkat a panagbakuna iti probinsia ken ti detalye iti maawatda a bakuna.
Mainaig iti daytoy ket inaklon ni Gov, Diclas nga awan ti umdas wenno partikular a pondo nga inlatang ti provincial government para iti panakagatang ti COVID-19 vaccines para kadagiti umili ti Benguet isut gapuna nga ur-urayenda ti ipaay ti nasyonal a gobierno.
Innayonna nga ita ket saan a ti bakuna kontra iti COVID-19 ti pakakumkumikuman ti provincial government gaputa manageable paylaeng dagiti kaso ti nasao a sakit iti Benguet ken nababa paylaeng ti mortality rate ti probinsya iti COVID-19.
