BAGUIO CITY – Saan pay a mapalubusan nga agawid dagiti residente ti Baguio nga stranded wenno napupuk iti ruar ti siudad.
Sigun kenni Mayor Benjamin Magalong, kanselado paylaeng ti programa para kadagiti returning Baguio residents gaputa maipimpinal paylaeng dagiti health protocols a nasken a maipatungpal.
Kinunana a kasapulan a maisimpa dagiti health protocols tapnu saan a mapunno unay dagiti health and safety facilities ti siudad iti kanito a mapalubusanen ti panagsubli ditoy Baguio dagiti nasao a residente.
Gapu iti daytoy, kidkiddawen ti mayor ti panakaawat dagiti maseknan gaputa ipampangruna laeng ti lokal a gobyerno ti kinatalged ti siudad iti kanito a mapalubusanen ti panagawid dagitoy maseknan a residente.
Inaklon pay ti mayor nga awan ti umdas a triage, quarantine ken health facilities a mangakomodar kadagiti adu a returning Baguio residentes.
Naamuan nga agarup 50,000 a residente ti Baguio a napukpuk iti ruar ti siudad ti kayatdan nga agawid.
Nangbukel metten ti technical working group iti panangidaulo ni Engineer Philip Puzon iti pagalagadan para iti sistematiko a proseso para kadagiti returning residents ken kadagiti non-residents, pakairamanan ti agarup 2,000 nga estudyante a napupuk met ditoy Baguio a kayatda ti agawid iti nagtaudanda a lugar.
