BAGUIO CITY – Maipatpatungpal ita ti pilot testing ti Salaknib Tan Namnama a programa ti Department of Education (DepEd)-Cordillera kadagiti tallo a pagadalan iti probinsia ti Benguet.
Dinakamatna ni DepEd-CAR Education Program Supervisor Denia Tarnate a karaman ditoy ti Benguet National Highschool, Buguias National High School ken Puguis Elementary School.
Manipud kadagiti tallo a pagadalan, kinunana a 63 nga estudyante ti maipaayan iti tablets, grocery packs, health kits, school supplies ken allowance iti binulan.
Maipalagip a nabukkel ti nasao a programa babaen iti initiatibo ni DepEd-CAR Regional Director Estella Carino iti panggep a maksayan ti gastos dagiti nagannak iti panangpaadalda kadagiti anakda.