Kiniddaw ti House prosecution panel iti impeachment trial ita nga aldaw iti defense team nga ag-stipulate mainaig kadagiti transaksyon ni sigud a Department of Education (DepEd) Special Disbursing Officer Edward Fajarda.
Karaman iti impila ti prosekusyon ti panang-encash ni Fajarda iti tallo a tseke manipud DepEd nga addaan pakabuklan a gatad a P112M wenno P37.5M tunggal tseke.
Kiniddaw metlaeng ti House panel a mapagnunumuan iti panang-disburse wenno panangi-turn over ni Fajarda iti nasao a kwarta kenni Col. Dennis Nolasco, sigud a Deputy Commander ng Vice Presidential Security and Protection Group.
Nu pay naaddaan iti argumento iti tengga iti agsinnungbangir a partido maipapan iti panagsabali iti termino a ‘turn-over’ ken ‘disburse’, napagnunumuan babaen kenni Trial Presiding Officer Chiz Escudero a naawat ni Nolasco iti nasao a pondo.
Kiniddaw pay ti prosekusyon nga awaten ti depensa nga inted ni Fajarda kenni Nalasco ti kwarta babaen iti bilin ni VP Sara kas iti immuna a statement iti opisyal iti panagdingeg iti House Justice Panel.
Karaman met iti counter-stipulation ti Defense Team ti panangilawlawag nga awan iti direkta nga ammo ni Fajarda iti aktwal a panangaramat iti pondo uray daytoy ti nagpirma kadagiti sumagmamano a certification iti panangi-disburse iti pundo.
Kabayatanna, inawat met ti depensa ti kaaduan iti agarup 13 request for stipulation manipud iti House panel kalpasan a nakumpirmar a saanen makatestigo ni Fajarda iti trial gapu iti kondisyonna.
Maipalagip a naituding nga agbalin a testigo ni Fajarda ngem mannarimaan a naka-confine daytoy iti pagagasan kalpasan a na-stroke.//Bombo Khey Reparip
