Impaganetget ti Philippine Statistics Authority (PSA) nga awan ti rekord iti pannakayanak, panagkallaysa, ken ipupusay ti nasurok 1,000 a nagan a nakalista kas recipients iti confidential fund payments manipud iti Office of the Vice President (OVP) ken Department of Education (DepEd).
Daytoy ti inwaragawag ni PSA Assistant National Statistician Marizza Grande bayat iti panagtestigona ita nga aldaw mainaig iti saan nga umiso a panagaramat iti confidential funds ti OVP ken DepEd.
Dagiti nasao a nagan, pakairamanan ti “Mary Grace Piattos” ken “Andy Lim” ket nagbalin a kontrobersial gapu ta agparparang nga agpapada a nagan dagitoy iti tinapay, taraon, taraken,ken dadduma pay.
Nupay kasta, sigun iti depensa, mabalin alyas laeng dagitoy nga inusar dagiti informants.
Gapu iti daytoy, nagrequest ti House Committee on Good Government and Public Accountability iti pannakasukimat dagitoy a nagan no sadino naduktalan a 1,685 a nagan ti awan iti rekord ti PSA.
Malaksid iti dayta, naduktalan pay a manipud iti 1,992 a payees iti OVP ket 1,287iti awan rekordna iti PSA bayat nga manipud iti 677 a DepEd payees, 398 met ditoy ti awan ti rekord na iti ahensya.
Kabayatanna, naduktalan pay a 25 kadagiti payees ket nag-match iti nagan dagiti menor-de-edad pakairamanan ti maysa a maladaga nga agtawen iti maysa base iti birth certificate dagitoy.//Bombo Khey Reparip
