Patien ni Senator-Judge Erwin Tulfo a rumbeng laeng a maawagan da security officers Colonel Raymund Lachica ken Colonel Dennis Nolasco nga agbalin a witness para iti impeachment trial ni Vice President Sara Duterte tapno mangipaay iti testimonyoda mainaig kadagiti naidumduma a nagnagan kadagiti acknowledgement receipts iti confidential funds.
Inaramid ti senador ti manifestation bayat iti panagtestimonya ni Philippine Statistics Authority (PSA) Assistant National Statistician Marizza Grande no sadino naduktalan babaen iti panagsukimatda a dagiti dadduma a nausar a nagan iti payees iti Office of the Vice President (OVP) ken Department of Education (DepEd) ket awan iti rekord iti PSA.
Maipalagip nga inwaragawag ti House prosecution idi Biernes, Septiembre 5, a saandan nga ipresenta da Lachica ken Nolasco, kasta met ni Ramil Madriaga kas witness iti impeachment trial.
Ni Lachica ken Nolasco ket nagserbi kas Chief ken Deputy Chief iti Vice Presidential Security and Protection Group. Mapapati a dagitoy ti nang-disburse iti confidential funds iti OVP ken DepEd.//BomboKhey
