BAGUIO CITY – Agpapaimbag paylaeng iti pagagasan ti maysa a pulis kalpasan a nadangran idi naaksidente ti kotsena sadiay Mogao, Adaoay, Kabayan, Benguet idi kalman.
Nabigbig daytoy a ni Police Staff Sergeant Keithly Canuto Gavino, 32-anyos ken nakadestino iti Kabayan Municipal Police Station.
Maibasar iti report, agbibiahe ti biktima iti pakurba a paset ti kalsada paturong iti direksion ti La Trinidad, Benguet idi natnag ti lugan iti rangkis nga addaan kauneg a dumanon iti 500 a metro.
Naamuan a natnag ti lugan ni Gavino kalpasan a liniklikanna ti maysa a pasalog a kalsada ken saanna a nakita ti road cut gapu iti naangep a kasasaad ti panawen.
Naitaray daytoy iti pagagasan kalpasan nga inispal dagiti maseknan nga umili bayat a ti luganna ket naan-anay a nadadael.
