BAGUIO CITY – Ikagkagumaan ti lokal a gobyerno ti Baguio nga agtrabaho iti doble tapnu manayonan ti bed capacities ti Baguio City Community Isolation Unit ken ti Teachers’ Camp tapnu maakomodar ti ad-adu pay nga asymptomatic, mild ken moderate cases ti COVID-19.
Sigun kenni Mayor Benjamin Magalong, maisimsimpan ti Baguio City Community Isolation Unit tapnu agserbi daytoy kas ‘step down facility’ a mabalin a pangkompletuan dagiti maim-imbaganen a pasyente iti naituding nga isolation period dagitoy.
Manamnama a makatulong dagitoy iti panakakissay dagiti pasyente nga adda ita iti COVID wards dagiti parapubliko ken pribado nga ospital a makapaspasar ita iti full capacity.
Sigun met kenni City Administrator Engr. Bonifacio Dela Peña, manarimaan ti panakanayon dagiti silid ken ti panakaimuntar dagiti baro a kama dagiti dua nga isolation units.
Manamnama pay a babaen kadagitoy ket maisagana ti siudad a mangakomodar iti mapattapatta a 10 percent positivity rate wenno agarup 300 a posible a positibo a kaso manipud iti tallo nga aldaw nga agresibo a community testing a narugianen sadiay Melvin Jones.
