BAGUIO CITY- Agsagsaganan dagiti rallyista iti siudad ti Baguio ken probinsia iti Benguet para iti isayangkat dagitoy a rally iti siudad ti Baguio intun September 21, 2025.
Pasetan daytoy dagiti agtutubo, transport group, manursuro, nagduduma a sektor ken dadduma pay a maseknan.
Iti pannakiuman ti Bombo Radyo kenni Louise Montenegro, miembero ti Baguio-Benguet Laban sa Corruption, kinunana a mangrugi ti Rally iti 9:00 AM bayat a maangay ti programa iti 10:00 AM.
Agmartsa dagitoy manipud iti Baguio Convention and Cultural Center grounds agingga iti Malcom Square.
Sigun kenni Montenegro, kangrunaan a kiddawenda ti anti-corruption ken pannakaisubli dagiti natakaw a kuarta ti pagilian.
Impettengna a kasapulan a napartak ti imbestigasion tapno masungbatan dagiti nakabasol dagiti korapsion a mapaspasamak iti pagilian.
Impanamnama ni Montenegro a natalna ti ipatungpalda a rally ken awan ti mapasamak a kinaranggas.//mp4
