BAGUIO CITY – Imbinsa-binsa ti Department of the Interior and Local Government (DILG) – Cordillera dagiti rason iti panakaipasidong dagiti tallo a probinsia ti rehiyon iti Alert Level 4.
Sigun kenni DILG-Cordillera Regional Director Araceli San Jose, nagbalin a basaran ti National IATF ti kangato ti healthcare ulitization rate; 2-week growth rate; average daily attack ken panag-ado ti kaso iti COVID-19 dagiti probinsia ti Ifugao, Kalinga ken Mountain Province.
Kinunana a napagnunumoan ti panakaipasidong dagiti tallo a probinsia iti nail-ilet nga Alert Level tapnu mapababa ken matutukan ti healthcare utilization rate dagitoy.
Inlawlawagna met a naobserbaranda ti kaado dagiti mild cases kadagiti ospital kadagiti nasao a probinsia isut gapuna nga inrekomendarda ti panangiyakar dagitoy kadagiti mild cases kadagiti Temporary Treatment and Monitoring Facilities tapnu maakomodar dagiti ospital dagiti severe ken critical cases.
Kitkitaenda pay ti posibilidad a manayunan dagiti hospital beds a maka-akomodar kadagiti pasiente ti COVID-19.
Gapu iti daytoy, inyunay-unay ni San Jose ti panangbukel dagiti LGUs iti maysa nga ordinansa a manglimitar iti mobility wenno pannaggaraw dagiti indibidual a saan pay a nabakunaan kontra iti COVID-19.
