BAGUIO CITY – Naduktalan nga asphyxia secondary to blunt traumatic injuries to the neck and chest ti rason ti ipupusay ti nasarakan a bangkay ti babai iti Bued River idiay Sitio Kaipilan, Barangay Camp 3, Tuba, Benguet idi Hunyo 11.
Sigun kadagiti otoridad, saan pay a nabigbig ti nasao a bangkay ken awan ti nakita nga aniaman a tattoo wenno marka a makatulong iti pakabigbiganna gapu ta agruprupsan daytoy.
Maipalagip a nasarakan ti bangkay a tumtumpaw iti Bued River iti nasao nga aldaw.
Iti immunan nga inisyal nga imbestigasyon ti Scene of the Crime Operatives (SOCO), agtayag ti babai ti 160 cm.
Kidkiddawen met ti Tuba Municipal Police Station ti koordinasyon ti publiko seknan iti mapukpukawan ti kapamilya wenno kabagian nga agturongda iti kustodiya dagitoy tapno matulonganda iti pakabigbigan ti nasao a bangkay.
Temporaryo a naiturong ti bangkay iti Poblacion Public Cemetery idiay Bomasgao, Poblacion, Tuba, Benguet.
