BAGUIO CITY- Kidkiddawen dagiti city officials kadagiti amin a vendors iti merkado publiko iti siudad ti Baguio ti kooperasyon ken tulongda para iti rat catching challenge a mangrugi inton bigat agingga into Agosto trentay uno, iti agdama a tawen.
Iti pannakiuman ti Bombo Radyo kenni Baguio City Market Superintendent Ceasar Emilio a panggep ti nasao nga aktibidad a makissayan dagiti utot tapno maliklikan ti aniaman a sakit kas iti leptospirosis partikular ita panawen ti panagtutudo.
Sigun kenkuana naobserbaran dagitoy ti panagadu dagiti utot iti merkado publiko isu’t gapuna a maipatungpal manen daytoy nga aktibidad.
Ti rat catching challenge ket inrugi ni Mayor Banjamin Magalong idi 2020 tapnu makissayan dagiti utot iti palengke para iti kinadalus ken para metlaeng iti salun-at ti tumunggal maysa.
Dagiti matiliw nga utot ket kolektaen ti City Veterinary and Agriculture Office (CVAO), mangrugi iti alas otso iti bigat agingga alas singko iti malem tunggal lunes agingga sabado.
Kabayatanna, dagiti kaaduan ti natiliwna nga utot ket makaawat iti P25,000 cash prize ; P15,000 cash prize para iti 2nd place bayat a ti 3rd place ket makaawat iti P10,000 cash prize.
Malaksid iti dayta, makaawat iti P5,000 cash prize ti tunggal indibidual nga addaan iti kaaduan a natiliw nga utot.
Maiyu-unay met iti publiko, ken dagiti vendors ti agtultuloy a pannakitinnulongda tapno bumassit dagitoy babaen iti panagdalus, ken panagikarga kadagiti mouse trap tunggal rabii.
