Isingsingasing dagiti residente iti Barangay Puguis a mailaylayon ti flood control projects iti Bolo Creek idiay La Trinidad, Benguet.
Sigun kenni Osburn Visaya, Kapitan ti Barangay Puguis, kidkiddawen dagiti residente a mailaylayon ti nasao a proyekto iti Puguis, Wangal ken Buyagan tapno malapdan dagiti posible a panaglayos iti kalsada a paturong kadagiti barangay dagitoy.
Gapu iti dayta, kinuna ni Barangay Kapitan Visaya a maaramid ti umno a resolusion iti Linga ng Mga Barangay-La Trinidad Chapter.
Maisubmitir ti resolusion a mangkiddaw ti pondo iti DPWH, Provincial government ken iti opisina ni Benguet Rep. Eric Yap tapno mapalawa ti flood control project a kiddaw dagiti residente sadiay Puguis.
Kabayatanna, umanamong ti nasao nga opisial iti saan a pannakaikkat ti pondo nga immuna a nairanta para iti pannakaipatungpal dagiti flood control projects iti intero a pagilian.
Inyunay-unayna a maipatungpal daytoy iti case-to-case basis, nangruna kadagiti lugar nga agkasapulan iti flood control project tapno malapdan ti layus iti lugar dagitoy.
