BAGUIO CITY – Inaprobaran ti lokal a konseho ti Baguio ti resolusyon a mangideklara iti liquor ban ditoy siudad kabayatan ti manarimaan nga enhanced community quarantine.
Nailanad pay ditoy ti panangguyugoy ti konseho kadagiti amin a business establishments iti siudad iti saan dagitoy a panangilako ti arak kabayatan ti quarantine period kas maysa a precautionary measure iti panakaipasigurado ti panagtulnog dagiti umili iti nainget a polisiya iti social distancing.
Sigun kadagiti mammanday linteg, gapu iti panag-inom iti alcohol a ramen ti arak ket mapabpababa ti resistensia ken agbalin a narisgo ti maysa a tao iti sakit a pneumonia ken iti respiratory illnesses a mangkompromiso iti salun-at ti maysa nga indibidual.
Nabukel ti resolusyon kalpasan a nakaawat dagiti opisyal ti siudad iti adu a reklamo iti panagin-inom dagiti residente ti siudad iti babbalay dagitoy iti baet ti implementasyon ti stay home policy.
Balballaagan met ti lokal a gobyerno dagiti aglabsing iti resolusyon iti panakaipataw ti pannusa kadagitoy kas iti dagus a panakawaswas ti business permit a naipaay kadagitoy.
Nakiddaw pay ti panangireport dagiti maseknan a residente kadagiti makitada nga establishimento nga aglabsing iti resolusyon.
Malaksid iti daytoy, ituloy dagiti personnel ti City Permits and Licensing Division ti City Mayor’s Office a mangwanawan iti operasyon dagiti nagduduma nga establishimento iti siudad nangruna dagiti agilaklako ti arak tapnu masiguro ti panakasurot ti naaprobaran a resolusyon.
