BAGUIO CITY–Impetteng ti Baguio Correspondents and Broadcasters Club (BCBC) a malabsing ti press freedom iti resolusyon ti Regional Law Enforcement Coordination Commitee (RLECC) ti Police Regional Office Cordillera (PROCOR) seknan iti panakaipatungpal ti Oplan Tokhang kadagiti nabigbig a left-leaning personalities iti gobierno, media ken dadduma nga entities.
Sigun kenni BCBC president Aldwin Quitasol, saan a maiyannatop ti resolusyon iti papel dagiti kameng ti media a mangipaay ti pudno nga impormasyon kadagiti umili.
Kinunana a ti resolusyon ket manglabsing iti karbengan ti maysa a media personality iti freedom of the press.
Inyunay-unayna pay a ti resolusyon ket manglapped laeng kadagiti media personalities a mangiwaragawag kadagiti impormasyon a naalada manipod kadagiti sources.
Innayonna a saan kuma a panunuten dagiti otoridad a supsuportaran dagiti kameng ti media ti CPP-NPA iti kanito nga adda ti maiwaragawagda seknan iti opinyon a nagtaud iti news sources dagitoy gaputa daytoy ti akem ti media.
Sigun pay kenkuana, saan a nasken a makontrol ti karbengan dagiti media personalities nga aggaraw ken mangipadamag kadagiti isyu iti lokalidad.
Tinagiragsakna met ti panangisanod ni Commission on Human Rights – Cordillera Regional Director Atty. Rommel Daguimol iti pirmana iti nasao a resolusyon kagiddan ti panangiyapelana iti panangibasura ti Cordillera Regional Peace and Order Council iti nasao a resolusyon.
