Naisumiter ita iti Office of the President ti resolution 266 series of 2025 tapno kiddawen ti panakaadal dagiti nagduduma a flood control projects partikular iti bolo creek sadiay La Trinidad, Benguet.
Iti panakiuman ti Bombo Radyo kenni Atty. Guiler Galwan, Vice Mayor ti La Trinidad, Benguet kinunana a naisumiter daytoy tapno maadal no epektibo metlaeng ti maar-aramid a bolo creek.
Daytoy ket kagiddan ti agbalbalin a pakaseknan dagiti umili sadiay a masansan a panaglayos tunggal napigsa ti panagbayakabak ti tudo.
Kinunana met a kanayon ti panag-inspeksyon dagiti opisyal sadiay babaen iti panangidaulo ni Mayor Roderick Awingan rason nga adda metten dagiti rekomendasyon nga insuhestiyon ti Engineering Office.
Impettengna nga adda pay dagiti nagduduma a programa a maipatpatungpal tapno masolbar ti pakaseknan iti panaglayos sadiay.
Nakadanon metlaeng daytoy iti opisina ti Department of Public Works and Highways rason nga addan dagiti sungbatda iti nasao a pakaseknan.
Kinunada a ti agdama a desenyo ti bolo creek ita ket daytoyen ti epektibo iti panangsolusyon iti panaglayos iti nasao a munisipyo partikular iti strawberry farm.
Malaksid iti dayta, kitkitaenda metlaeng ti panagrisut iti mapaspasaran a panaglayos sadiay Bayabas ken sadiay Km 3 La Trinidad, Benguet tapno matarimaan metlaeng dagiti drainage system iti nasao a munisipyo.
Gapu iti dayta, kiddawna kadagiti umili iti nasao a munisipyo ti suporta ken tulong dagitoy kas iti pannakipaset kadagiti clean up drives.
