Posible a maamuan ita nga aldaw ti resulta ti panagkiddaw ni sigud a presidential spokesperson Harry Roque iti asylum sadiay Netherlands.
Sigun kenni Interior and Local Government Secretary Jonvic Remulla, mabalin a mapaikkat ni Roque iti nasao a pagilian iti kanito a saan a mapatgan ti kiddaw daytoy.
Innayon pay ti opisial a human trafficking ti kaso ni Roque no sadino, banned iti amin a pagilian.
Maipalagip a naipaulog ti warrant of Arrest kontra kada Roque ken Cassandra Ong idi May 2025.
Karaman pay dagiti 48 nga indibidual gapu iti qualified human trafficking, mainaig iti maatap nga scam hub ti POGO firm a Lucky South 99 sadiay Porac, Pampanga.
Pinaglibakan met ni Roque dagiti alegasion ken kinunana a politically motivated ken saan nga agpayso.
Iti baet dayta, kiniddaw ti pagilian iti Interpol ti pannakaipaulog ti red notice kontra kenni Roque idi Nobiembre 2025.
Iti kapada a bulan, kinompermar ti Department of Foreign Affairs (DFA) a nakanselar ti passport ni Roque.
