BAGUIO CITY – Dinadael dagiti anti-drug operatives ti rinibribo a pinuon ti marijuana nga aggatad ti P2.16-M iti eradication operation dagitoy sadiay Lacnog, Tabuk City, Kalinga idi kalman.
Maibasar iti report ti PDEA-Kalinga, nadiskobre ti 10,800 a pinuon ti marijuana a naimula ken matartaripato iti tallo a pagmulaan nga addaan kalawa a 1,800 square meters.
Dagus nga inuram ken pinarut dagiti operatiba dagiti iligal a mula nupay awan ti natiliw a marijuana cultivator kabayatan ti operasyon.
Kagiddan iti daytoy, impalagip dagiti otoridad a ti panagmula iti marijuana ket mailabsing iti Republic Act 9165 wenno ti Comprehensive Dangerous Drugs Act of 2002 ken asinoman a maaktuwan nga agmulmula iti daytoy ket matiliw, maibalud iti tungpal biag ken mamulta iti P500-K agingga P10-M.
