Agtultuloy iti panagbantay dagiti opisyales iti Brgy. Irisan, Baguio City kadagiti masakupanda nangruna nu umay dagiti napigsa a panagtudo nga epekto paylaeng iti Habagat.
Iti pannakiuman iti Bombo Radyo kenni Arthur Carlos, Punong Barangay iti Brgy. Irisan, Baguio City, imbinglayna nga iti agdama, nasayaat ti kasasaad iti umili iti nasao a barangay.
Nupay kasta, inlawlawag ni Carlos ti isyu maipapan iti paset ti kalsada idiay Purok 22 ti barangay a mapapati nga adda dagiti road obstruction a makaapektar kadagiti residente nangruna iti panagdalyasat dagitoy iti nasao a dalan.
Sigun iti kapitan, tagtagikuaen ti maysa a residente ti maysa a paset iti kalsada sadiay no sadino private property daytoy.
Inlawlawag pay iti nasao nga opisyal a pinadasna a nakikatungtong iti daytoy no mabalin a mawayaan ti kalsada ngem sigun iti residente, titulado ken paset daytoy iti private property-da.
Iti agdama, agtultuloy nga al-allukoyenna iti private owner tapno i-donar ti daga para met laeng kadagiti residente iti nasao a lugar.
Iti sabali a bangir, inaklonna nga adda paylaeng dagiti pakaseknan iti barangay maipapan iti anti-road obstruction. Gapu iti dayta, nakikoordinardan iti Public Order and Safety Division ken kameng iti pulisia tapno maipaayan iti solusyon ti nasao nga isyu.
Impasiguradona met nga ar-aramidenda amin tapno mapasayaat ken maipaayan iti solusyon dagiti problema iti masakupanna a barangay. |via Bombo Khey Reparip
