BAGUIO CITY – Saan pay a nasulbar ti kaso ti robbery with homicide a napasamak idiay Barangay Fairview, Baguio City idi Disyembre 5, 2023.
Maipalagip nga idi napan a tawen ket pinapatay dagiti agtatakaw ti biktima a ni Kamille Biscocho, 29-anyos, ina ti 2-anyos nga ubing.
Iti interview ti Bombo Radyo kenni Pmaj Harriet Bulcio, Information Officer ti Baguio City Police Office, marigatanda a mangbigbig kadagiti primary suspects ngem addan dagiti bambantayanda a tallo agingga uppat a persons of interest.
Nupay kasta, kinunana a saanda pay a mabalin nga innaganan dagitoy gapu ta kasapulanda pay ti kanayonan nga ebidensiya.
Impanamnama met ni PMaj. Bulcio nga aramidenda ti amin tapno masulbar ti nasao a kaso.
Kagiddan iti daytoy, kidkiddawenna manen ti tulong ti publiko nangruna dagiti nakakita kadagiti suspek tapno dagus a mangipaay dagitoy ti impormasyon.
Immunan a nakapatang ti Bombo Radyo Baguio ti asawa ti biktima a ni Lucky Bryan Biscocho idi Enero ti agdama a tawen nu sadino ipukpukkawna ti hustisya para iti pimmusay nga asawana.//Cara/Jez Lapizar
