Impeksa ni Evelyn Pacleb, maysa a retired teacher sadiay La Union nga ita a panawen ti nangina a lawas ket saan a dagiti taraon a maipaun-uneg ti mangpasanto iti maysa a tao no di ket dagiti aramid daytoy kadagiti daduma a tattao.
Iti panakiuman ti Bombo Radyo kenni Pacleb, kinunana a dagiti aramid a mangpasanto iti maysa a tao ket no kasanona nga ipakita ti panagayatna kadagiti padana a tao, no kasano daytoy a tumulong kadagiti agkasapulan nangruna kadagiti masakit, kadagiti nakabalod, ken kadagiti marigrigat.
Inlawlawg met ni Pacleb a ti Black Saturday ket saan a daytoy ti aldaw a nagungar ni Hesu Kristo gapu ta daytoy ket nagungar iti maikatlo nga aldaw, iti aldaw ti Easter Sunday.
Iti panagungar ni Hesu Kristo, impaganetget ni Pacleb a daytoy ti mangipakpakita no kasanu a pinarmek ni Kristo ti patay ken daytoy met ti agbalbalin a namnama kadagiti amin a sibibiyag nga iti kamaudiananna ket agungar to met laeng dagitoy paturong iti lugar nga insagana ni Hesu Kristo.
Ita a panawen ti semana santa, saan met a maiparit ti agbakasyon no pay kasta rumbeng nga ipangpangruna tayu ti naespiritoan tayu a biyag sakbay ti nailubongan a banbanag ken ti kanayun a panagkararag iti panagbiag tayu.//Mira
