BAGUIO CITY – Sukimaten ti lokal a konseho ti Baguio ti saan a panagpapada ti presyo dagiti mailaklako a karne iti merkado publiko ti siudad.
Iti panakiyuman ti Bombo Radyo Baguio kenni Councilor Philian Louise Weygan-Allan, chairman ti Committee on Market, Trade and Commerce, and Agriculture, kinunana a nalpasen ti panagwanawanda iti presyo dagiti karne a mailaklako iti merkado publiko.
Sigun kenkuana, naduktalanda nga adda dagiti agilaklako iti karne iti gatad a saan a maitunos iti suggested retail price (SRP) nga intuding ti Department of Agriculture ken Department of Trade and Industry.
Nupay kasta, dinakamatna nga iti panakiyumanda kadagiti meat vendors ket naamuanda a saan nga agpapada ti pagal-alaan dagitoy iti suplay ti karne.
Naamuan nga adda dagiti agal-ala ti suplay kadagiti agparparti ti baboy isut gapuna a nangato ti retail price dagitoy.
Innayonna nga adda met dagiti gumatgatang iti wholesale a karne ti baboy isut gapuna a nababa ti presyo ti lako dagitoy.
Nupay kasta, impanamnamana ti konsehal a talantanenda iti lokal a konseho ti nasao a pakaseknan.