BAGUIO CITY – Saan nga irekomendar ti ama ti Benguet ti panakaipasidong ti probinsia iti naing-inget a quarantine status iti baet ti panagngato manen dagiti kaso ti COVID-19 sadiay ken ti panakailista ti uppat a kaso ti Delta variant iti tallo a munisipyo sadiay.
Sigun kenni Governor Melchor Diclas, agtalinaed latta ti Modified General Community Quarantine nga estado ti probinsia agingga nga awan ti rekomendasyon nga agtaud iti National IATF.
Kinunana nga obserbaran ken urayenda laengen no ania ti agbalin a rekomendasyon ti National IATF gaputa nangipasa metten dagitoy ti report kadakuada.
Iti baet daytoy, impalagipna manen dagiti pagalagadan nga impaulogna kas iti polisiya a saan a mapastrek iti masakupan ti probinsia dagiti non-Benguet residents no saan dagitoy a mangipakita iti negatibo a resulta ti RT-PCR test wenno pammaneknek a dagitoy ket fully vaccinated.
Inyapelana metlaeng ti nainget a panagtungpal dagiti umili kadagiti minimum health standards nangruna ta naobserbaran nga adda metten ti community transmission iti probinsia a maysa a rason iti panagngato dagiti kaso ti COVID-19.
Napagnumuan pay ti work-from-home scheme kadagiti empleyado ti provincial government ken ahensia iti masakupan ti probinsia bayat a papigsaenda pay ti panakaipatungpal ti community testing tapnu maduktalan no asino pay dagiti nakaptan ti COVID-19.
Iti agdama, adda ti 10 a high risk barangay hotspots iti probinsia gapu iti COVID-19 bayat a mapumpunnon dagiti ospital iti Benguet kalpasan a nadanunen dagiti ospital ti nasurok 80% a hospital bed capacity rate.
Dumannon metten iti nasurok 11,200 ti kaso ti COVID-19 iti probinsya a pakairamanan ti 673 nga aktibo a kaso.
