BAGUIO CITY – Umap-apela ti mayor ti Sagada, Mountain Province kadagiti indibidual nga adda ita kadagiti high risk areas nga agtartarigagay nga agawid iti munisipyo tapnu saanda pay a patuloyen ti planoda.
Sigun kenni Mayor James Pooten Jr., kangrunaan ditoy dagiti adda ita sadiay National Capital Region a kayatda ti agawid sadiay Sagada.
Kinunana a masayang laeng dagiti naar-aramidan ti munisipyo tapnu makaliklikda iti COVID-19 no adda ti mailistada a kaso no adda dagiti agawid sadiay manipud kadagiti lugar nga addaan nangato a kaso ti COVID-19.
Impettengna a nasken laeng nga agbiahe dagiti umili ti munisipyo no napateg unay ti gagarada wenno adda ti emerhensia.
Imbilinna pay ti panakikoordinar nga umuna dagiti returning residents iti municipal DRRM Council tapnu maamuanda dagiti kasapulan nga iparangda a dokumento iti panagawidda sadiay Sagada.
