BAGUIO CITY – Posible nga ipaulog ti lokal a gobierno ti La Trinidad ti demolition order kontra iti developer ti maipatpatakder nga istruktura iti masakupan ti communal forest sadiay Shilan, La Trinidad, Benguet.
Kasaruno daytoy iti agtultuloy a patrabaho iti nasao a lugar iti baet a naipilan iti korte ti Temporary Environmental Protection Order (TEPO) ken naiserbian iti Cease and Desist Order ti developer idi napan a bulan.
Sigun kenni Municipal Environment and Natural Resources (MENRO) – Officer Arthur Pedro, awanan iti building permit ken dadduma pay a kaskenan a dokumento ti nasao a patrabaho.
Inyunay-unayna pay a saan a nangtungpal ti developer iti napagtulaganda iti naipatungpal a dialogoda iti lokal a gobierno.
Iti baet daytoy, maipatungpal manen ti sabali a serye ti panagdengngeg inton umay a bulan tapnu ditoy a maiparang dagiti ebidensya a mangpaneknek nga adda ti panaglabsing ti nasao a developer iti manarimaan a proyekto.
.
