BAGUIO CITY – Nakemmeg ti dua nga indibidual iti buy-bust operation nga insayangkat dagiti otoridad sadiay General Luna Street, Casigayan, Tabuk City, Kalinga idi kalman.
Nabigbig dagitoy a da Junie Gumpad, 33-anyos, naasawaan, residente ti Purok 7, Bulanao, Tabuk City ken Clever Vince Alisto, 21-anyos, baro, construction worker, residente ti Dagupan Weste, Tabuk City.
Nakumpiskar kadagiti dua ti maysa a pakete ti maatap a shabu nga agdagsen ti agarup nasurok uppat a gramo ken dagiti inaramatda a nakitransaksion iti operatiba.
Narekober pay iti ikotda ti naaramat a buy-bust money.
Naamuan a nakalista ni Gumpad kas maysa a High Value Target a drug personality a nakemmeg idi August 2017 iti kapada a panaglabsing bayat a nakalista met ni Alisto kas street level individual ken addaan warrant of arrest iti kaso a robbery ken siguden a nakemmeg gapu iti dua pay a kaso.
Kabayatanna, kinumpiskar dagiti otoridad ti tallo a rifle grenades ken kinemmegda ti maysa nga indibidual iti panangimplementarda iti 13 a search warrants sadiay Ag-agama, Western Uma ken Dugong, Lower Uma iti Lubuagan, Kalinga idi kalman.
Manipud kadagiti naimplemenmar a search warrants, nagresulta ti maysa kadagitoy iti panakakumpiskar ti tallo a granada ken iti panakakemmeg ni Beatrice Bilin.
Sumango daytoy iti kaso gapu iti illegal possession of explosives.
