BAGUIO CITY – Binigbig ken pinadayawan ti dadaulo ti Department of Education (DepEd) – Cordillera dagiti mannursuro iti rehion Cordillera kagiddan ti panakarambak ti National Teachers’ Month.
Sigun kenni DepEd-Cordillera Regional Director Estela Cariño, nasken a mapadayawan dagiti mannursuro kadagiti pribado ken parapubliko a pagadalan gapu iti sakripisyo ken didikasion dagitoy nga agserbi iti baet dagiti karit ti blended learning nga intunda ti agdama a pandemya.
Maramrambakan ita a Setyembre ti National Teachers’ Month nga addaan ti tema a “Gurong Filipino: Katuwang sa Hamon, Kasama sa Pagbangon.”
Sigun pay kenni Cariño, napateg para kadagiti mannursuro ti kanayon a kinasagana ti kondision ti pisikal ken mentalidad dagitoy nangruna ta makalawas laengen ti nabatbati sakbay a mangrugi ti klase para iti school year 2021-2022
Kagiddan iti daytoy, kiniddawna ti panangaramid dagiti mannursuro iti nagduduma a wagas ken pagaramatda kadagiti dadduma a resources iti panagsuroda tapnu maliklikan ti panaggastosda babaen iti bukodda a kwarta.
Kabayatanna, mangiwaras ti DepEd-Cordillera kadagiti tablets ngem daytoy ket para kadagiti pagadalan nga addaan ti Learning Management System.
