Nangidatag iti saludsod ita laeng nga aldaw ti maysa a mammanday-linteg iti saludsod nu maikari dagiti opisial ti Ninoy Aquino International Airport (NAIA) Terminal 3 a mangasikaso iti naisangsangayan a kasasaad.
Kasaruno ti insidente iti nasao nga airport a lamolamo ti maysa a babai a Vietnamese a magmagna sadiay.
Para kenni Tulfo, mabalin a saan a nakasagana dagiti airport security iti aniaman a kasasaad wenno parikut a mapasak kas maimatangan iti video a nagwaras iti social media idi napalabas a lawas.
Gapu iti dayta, kayat ni Tulfo a masungbatan ti damagna babaen iti senate inquiry.
Inayonna pay a posible a mangipila daytoy ti Senate resolution tapno maimbestigaran ti napasamak nangruna iti panag-handle ti security protocol iti pasilidad ti airport.
Sigun iti maysa nga staff iti airport, ti ganganaet ket maatap a “na-offload” dagiti kagawaanna manipod iti “flight” paturong iti Chi Minh City iti Hunio 9, 2024.
Kinuna met ni APO1 Michael Ronald de Guzman, NAIA Terminal 3 airport police, nagturong ti babai iti cr nu sadinno, lamo-lamo a rimwar daytoy kalpasan ti sumagmamano a kanito.
Dagos met a nangipaay dagiti airpot personnel ti bado, danum ken wheelchair iti Vietnamese a babai ken pinakalmada daytoy.
Kalpasana a simmayaat ti kondisionna, napalubusan ti babai a nagturong idiay Vietnam iti kinabigatanna.
Kabayatanna, impaganetget ni Tulfo ti kinapateg ti panangilasin kadagiti akem ken pagrebbengan ti Philippine National Police Aviation Security Group, Manila International Airport Authority, Office for Transportation Security, blue guards ken dadduma pay a maseknan nga ahensia tapno maliklikan ti maaw-awagan a “blame game.”
