BAGUIO CITY – Agtaltalinaed a nasayaat dagiti Person’s Deprived of Liberty iti Baguio City Jail Male Dormitory iti agdama.
Kasaruno daytoy ti insidente a panagsakit dagiti balud iti uneg ti pagbaludan idiay Iloilo City gapu iti kinapudot ti panawen.
Iti interview ti Bombo Radyo kenni Jail Superintendent April Rose Wandag-Ayangwa, Warden ti Baguio City Jail Dormitory, mangipatpatungpalda ti preventive measures babaen iti tulong dagiti health service personnel ket mabantayan ti salun-at dagiti balud.
Sigun kenkuana, napintasen ti congestion rate ti pasilidad gapu ta bimmaba ti populasyon dagiti balud manipud iti nasurok 400 ket nagbalinen a 307 iti agdama.
Kinunana pay nga umdas ti alikamen nga aramten dagiti balud iti panawen ti summer nangruna ta mapaspasaran ti El Nino phenomenon.
Innayona ni Ayangwa a nasayaat ti panagsangpet ti suplay ti danum iti uneg ti pagbaludan.
Iti sabali a bangir, maipatungpal ti Lenten Recollection and activities dagitoy ita nga holy week pakairamanan daytoy ti ‘washing of the feet’ dagiti balud, Seven last word, Adoration of the Blessed Sacrament, ken Easter Sunday mass.
Kabayatanna, nakalukat met ti opisina para iti panagbisita kadagiti balud ita nga holy week iti sigud metlaeng nga oras ken aldaw.//Bombo Marinel Rodrigo
