Immabante iti maikadua a pannakaibasana iti Sangguniang Panlalawigan iti Kalinga ti singasing nga ordinansa a mangipaay iti financial assistance kadagiti umili a saan a pulos a nagasawa.
Sigun kenni Board Member Camilo T. Lammawin Jr., nangisurat iti singasing, panggep daytoy nga ibangon ti “Self-Cared Individual Program” iti sidong iti Office of the Provincial Social Welfare and Development Officer (OPSWDO).
Iti sidong iti singasing, dagiti kwalipikado a benepisiario nga agtawen iti 51 agingga iti 59 a maibilang nga indigent ken awan asawana ket makaawat iti P5,000 a tulong tunggal semestre, nga agtaud manipod iti Family Welfare Program Fund iti OPSWDO.
Sigun iti singasing, panggep daytoy a bigbigen dagiti indibidual nga awanan iti asawa wenno anak a kadawyan nga awan ti kapada a suporta manipod iti pamilia, ken tulungan kadagiti kangrunaan a pagastusanda a kas iti agas ken maintenance.
Kinuna ni Lammawin nga uray bassit ti gatad, makatulong daytoy iti inaldaw a kasapulan dagiti benepisiario ken agserbi a panangbigbig iti papelda iti komunidad.
Naaprobaran ti singasing iti maikadua a panagbasa iti sesion nga indauloan ni Jerome Chester Alunday, ngem kasapulan pay daytoy a maipasa iti maikatlo ken maudi a pannakaibasana sakbay a naan-anay nga agbalin nga ordinansa.
