Impetteng ni Pcpt. Mark Organo Botangen, dadaulo ti Traffic Management Section ti La Trinidad Municipal Police Station a dakkel a tulong ti pannakaaramat dagiti drones kas katulongan iti panangmonitor iti gunay ti trapiko nangnangruna kadagiti thoroughfare wenno kangrunaan a kalkalsada iti munisipyo ti La Trinidad.
Iti eksklusibo a pannakiuman ti Bombo Radyo Newsteam kenni Pcpt. Botangen, naiyuswat ti panagaramat ti drones idi rugi ti klase wenno ita a bulan babaen iti initiatiba ti Benguet Police Provincial Office iti panangidaulo ni PCol Dionisio Bonoy, Provincial Director no sadinno mamonitor ti gunay ti trapiko babaen iti live drone feeds.
Ti Live Drone feeds ti mangipaay iti real-time aerial footage babaen iti drones para iti naparpartak nga assessment iti gunay ti trapiko kadagiti thoroughfare no sadino makita nu ayna a banda ti congested wenno addan nailet a gunay iti trapiko.
Innayon ni Botangen a makatulong metlaeng daytoy para iti nasaysayaat wenno strategic a pannakadeploy dagiti kapulisan a tumulong para iti panangimando iti gunay ti trapiko iti nasao a munisipyo.
Iti agdama, uppate a sektor ti La Trinidada ti pakadepdeployan dagiti nasao a drones para iti live feeds.
Kabayatanna, impeksa ni Botangen a sipud nangrugi ti nasao nga initiatiba, nasayaat met ti resulta daytoy malaksid laeng iti life span ti baterya dagiti drones nga isu ti maysa kadagiti ikonkonsidera dagitoy pakairamanan ti nasayaat a paniempo.
Ti met live drone feeds ket mabalin a mabuya iti opisyal a page dagitoy a Pnp La Trinidad Municipal Office main page.
Maguyguyugoy met ti publiko nangruna dagiti motorista a buyaenda wenno bisitaenda ti nasao a page tapno agbalin dagitoy nga updated iti sitwasyon ti kalsada ken tapno metlaeng maplanoda a nasayaat ti panagbyahe dagitoy. //Bombo Noveh Organo
