BAGUIO CITY – Panggep ti Baguio, La Trinidad, Itogon, Sablan, Tuba, Tublay (BLISTT) Sang-atan bike festival a maiwaras ken mapadakkel pay ti cycling community iti probinsiya ti Benguet ken pagbalinen ti panagbisekleta kas means of transportation.
Daytoy ti kinuna ni Christian David Alacar, Race Director ken co-convener ti BLISTT Sang-atan Bike Festival.
Sigun kenkuana, adu ti benepisyo ti panagbisiklita iti bagi kasta metten iti komunidad.
Maipalagip a naipatungpal ita nga aldaw ti Criterium race nu sadino nakipasetan ti agarup 350 a bikers ken cyclists.
Daytoy ti rason ti panakaiparikep ti sumagmamano a kalsada iti central business district kas iti Lake drive ken 2 lanes ti Harrison road tapno maipasigurado ti seguridad dagiti bikers ken cyclists.
Mainaig ti road closure, naipaayan ti temporaryo nga staging area dagiti jeepneys gapu ta karaman a naiparikep ti Margarita drive agingga iti alas sais ti sardam ita nga aldaw.
Para kadagiti jeep manipod Bakakeng, iti Abad Santos nga asideg iti library ti nagparadaan dagitoy; ti jeep ti Campo Sioco ket temporaryo nga agparada iti Otek; ken ti jeep ti Kias ket idiay Lower Mabini nga asideg iti maysa a bangko.
Malaksid iti Criterium race, maangay met inton bigat ti gravel ride wenno fun bike ride nu sadino dagiti agarup 500 a cyclist ket agtour idiay Itogon, Tinungdan, Mt. Anapol ken agsubli-da iti siudad ti Baguio.
Mangrugi daytoy iti 6AM agingga 9:30PM.
Awan ti maipatungpal a road closure para iti nasao nga aktbidad.
