BAGUIO CITY- Dumanonen iti sangapulo ket innem (16) ti pimmusay gapu iti epekto ti agtultuloy a panagbayakabak ti tudo ken angin sadiay California.
Iti interview ti Bombo Radyo, kinuna ni Bombo International Correspondents iti California Jun Villanueva, a mapatta-patta a dumanon iti 34-M nga indibidual ti maapektaran nu agtultuloy ti panagbayakabak ti napigsa a tudo ken agin iti paset ti Los Angeles, San Diego Area, Northern ken Southern part ti nasao a pagilian.
Maibasar met iti datus ti National Oceanic Atmospheric Disaster Experts Administration, agarup 1-Billion ti nadadael iti naapektraan a pagilian gapu paylaeng iti panagtudo bayat iti isasangbay ti baro tawen.
Nupay kasta, kinuna ti maysa nga opisyal sadiay a kasapulan a mataming a naimbag ti panagbaliwbaliw ti pannawen wenno climate change gapu ta nakaro ti sitwasyon a mapaspasaran ti nasao a pagilian iti agdama.
Gapu iti dayta, indeklara met ni President Joe Biden ti ‘state of emergency’ iti 17 a counties ti pagilian tapno mapadaras ti pannangipaay iti kasapulan a pundo dagiti evacuation center.
Kabayatanna, awan met ti naipadamag a naapektaran a Pilipino Community ngem agsagsagana dagitoy ti addang para iti tulong a maipaay iti nasao a pagilian.//Bombo Marinel Rodrigo
