Umap-apela ti Sangguniang Kabataan (SK) Federation ti Baguio City seknan iti panakapapartak ti panakakompleto dagiti kameng ti Sangguniang Kabataan kadagiti nagduduma a barangay tapno marugian ti panakaipatungpal ti proyekto.
Iti panakiuman ti Bombo Radyo kenni Jhon Rey Mananeng, Sangguniang Kabataan Federation President iti Baguio City, manipud iti 128 a barangay iti siudad, 110 laeng ti barangay ti addaan ti Sangguniang Kabataan Chairman bayat a 52 a barangay ti addaan ti quorum wenno minimum a miyembro ken 16 laeng a barangay ti kompleto ti opisyalesna para iti Sangguninag Kabataan a buklen ti maysa a Sangguniang Kabataan Chairman, pito a Sangguniang Kabataan members, secretary ken treasurer.
Mainaig iti dayta, awanan pay ti Sangguniang Kabataan Chairman ti sangapulo ket walo a barangay ti siudad.
Sigun kenni Mananeng, nabayagen a kiniddawda ti panakaipatungpal ti special election wenno appointment iti Commission on Elections (COMELEC) nu sadino naipaayan da ti tallo pulo nga aldaw.
Malaksid iti dayta, nagbalin pay a damag nu ti Commission on Elections ti naituding a mangipatungpal ti special election wenno ti Department of Interior and Local Government (DILG).
Kas sungbat, kinuna ti Department of the Interior and Local Government a saan nga ag-aplikar ti special election kas maibasar iti Sangguniang Kabataan Reform Act of 2020 gapu ta ti nakalanad laeng ket ti appointment nu bakante ti posisyon ti Sangguniang Kabataan chairman ken Sangguniang Kabataan members.
Personal pay a nagturong ni Mananeng iti opisina ti Department of the Interior and Local Government para iti nasao a pakaseknan ngem kinuna ti ahensya a kasapulan nga urayen nu anya ti direktiba wenno guidelines manipud iti Central Office.
Impeksa ni Mananeng a ti panakaipatungpal ti special election ket saan laeng a kiddaw ti siudad ti Baguio nu di ket ti entiro a pagilian gapu ta daduma a barangay iti pagilian ket saan a kompleto dagiti opisyales dagitoy para iti Sangguniang Kabataan.
Maipalagip nga agarup innem a bulan ti napalabas sipud ti local elections ngem saan paylaeng a nasolusyonan ti pakaseknan isu’t gapu na a maipatpatungpal ti online rally tapno masolusyonan daytoy iti kabiitan a panawen ken tapno maaramidda dagiti programa, proyekto ken aktibidad a mangpasayaat pay iti pagilian nangruna iti biyang dagiti agtutubo.//Bombo Mera Pacpacan
