Ad-adalen ni Israeli Prime Minister Benjamin Netanyahu ti insingasing ti grupo dagiti retirado nga heneral sadiay nga ipawil wenno ipasardeng ti panakaipaay iti humanitarian aid iti amianan a Gaza.
Sigun iti insingasing a plano dagiti retirado nga heneral, ti laengin panangitulok a mabisinan dagiti militante a grupo nga Hamas ti mabalin a pamuspusan tapno mapaksyat dagitoy manipod amianan a Gaza ken tapno mapilitanda a mangiwaya-waya kadagiti kinawtiboda.
Nupay kasta, kaspangarigan ibilin ni Netanyahu ti panakaipatungpal ti nadakamat a plano, adu kadagiti Palestinian ti mairaman nga agbisin nangruna dagiti saan mangayat wenno saan a makabael a panawan dagiti pagtaenganda iti nadakamat a lugar.
Mainaig iti dayta, nangipaiyulogen ti Israel iti kaudian nga evacuation orders iti amianan a Gaza idi laeng kalman ngem saan pay a nadakamat nu paset daytoyen ti panagrugi ti panakaiyimplimaintar iti nasao a plano.
Kaspangarigan saan latta nga agbakwit dagiti sibilyan nga adda iti North Gaza, maibilang dagitoyen a combatants wenno nawayan dagiti militante a grupo a mangpapatay kadagitoy sigun iti maisingsinagsing a plano dagiti retirado nga heneral.
