BAGUIO CITY – Maituloy ita nga agsapa ti search and rescue operation iti dua a barito a mapapati a naiyanod iti karayan sadiay Wangal, La Trinidad, Benguet.
Nabigbig dagitoy a da Harley Diplat Rufino, 16-anyos ken Rommel Alsem Tadena, 17-anyos, agpada a residente ti Wangal, La Trinidad, Benguet.
Sigun kenni PMajor Roldan Cabatan, hepe ti La Trinidad PNP, sinukon ni Rufino ni Tadena idi August 12 ken idi pangaldaw ti August 13 ket nagturong dagitoy iti balay da Rufino tapnu mangan sakbayda a rimwar babaen iti motorsiklo.
Nupay kasta, agsapa idi kalman, August 14 ket nakita ti maysa a residente ti motorsiklo nga inaramat dagiti dua nga agtutubo iti igid ti karayan sadiay Lower Wangal.
Naisayangkat ti search and rescue operation iti deppaar ti Wangal Creek agingga iti Gayasi River ngem temporaryo a naisardeng gapu iti napegges nga ayos ti danum ken rumabiin.
Nupay kasta, umap-apela dagiti kabagian dagiti dua nga agtutubo kadagiti maka-ammo iti posible nga ayan dagitoy tapnu idanunda kadakuada.
