Naisardengen ti search and rescue operations iti narba a pasdek sadiay Angeles City, Pampanga.
Daytoy ket kalpasan nga awan ti senyales nga adda paylaeng ti sibibiag.
Sigun kenni Angeles City government’s public information office chief Jose “Jay” Pelayo IV, naisardeng ti search and rescue kalpasan dagiti final assessments.
Gapu iti dayta, naideklara nga isayangkat laengen dagiti otoridad ti retrieval operations.
Sigun iti Bureau of Fire Protection (BFP), suksukimaten dagiti responders dagiti posible a sumrekanda tapno mabirukan dagiti biktima.
Maipalagip a dumanon iti uppat dagiti naideklara a pimmusay , 16 paylaeng dagiti mapukpukaw bayat a 26 dagiti naispal.
Napasamak ti insidente kabayatan ti konstraksion iti maikasiam a kadsaaran ti pasdek idi Mayo 24, 2026.
