BAGUIO CITY – Agtultuloy ti pannakaipatungpal ti search and retrieval operation kadagiti biktima ti napasamak a Banaue Mudslide sadiay Sumigar, Viewpoint, Banaue, Ifugao.
Maibasar iti waragawag ni Banaue Mayor Wesley Dulawan, maysa laengen nga indibidual ti birbirukenda iti agdama.
Kinunana a rugyanda nga agkali ken agbiruk iti nagbeddengan ti Hungduan ken Kiangan ita nga aldaw babaen iti nagtipon a pwersa ti PNP, ARMY, SAF, RMFB, BFP, ken dagiti volunteers
Malaksid iti dayta, kinunana a mangipatungpalda iti naun-uneg a panagkali iti ground zero ken rugyanda nga agbiruk sadiay Magat Dam.
Kinuna pay ti mayor a napalubusanda nga agbirok sadiay Magat Dam babaen iti permiso a naawatda manipod iti SN Aboitiz Power, Inc., a mangimanmanehar iti nasao a dam kasta metten a nakaawatda iti motorboat a maaramat para iti rescue operations dagitoy manipod iti Nat’l Irrigation Authority ken Alfonso Lista Police Station.
Maipalagip a nasarakanen ti siam a bangkay dagiti biktima ti nasao a mudslide.
