Inlawlawag ni Security Officer Alfredo Fernandez ti Diplomat Hotel ti maatap a nagviral a pablaak maipapan iti saan dagitoy a panagkinaawatan kadagiti turista a napasamak idi Domingo.
Iti ekskusibo a panakiuman ti Bombo Radyo kenni Fernandez, kinunana a napunnon ti parking lot iti Diplomat hotel kasta met nga adda ti 14 a lugan a nakapila a sumrek iti nasao a tourist destination.
Nupay kasta, kellaat a nagcounter flow ti tallo a lugan a kayatda a makastrek.
Ngem, saan daytoy a pinalubusan ti security officer nangruna ket saan daytoy a maitunos iti pagalagadanda ken kasapulan nga agpila dagitoy tapno saan nga “unfair” kadagiti nakapila.
Gapu iti dayta, bimmaba dagiti turista ken ditoy a pinagsasaoanda iti dakes ti officer.
Kalpasan ti nasao a pasamak, impakaamo ti maysa nga officer kenni Fernandez a nagviral daytoy iti social media.
Sigun kenni Fernandez, ar-aramidenna laeng ti trabahona rason nga amin nga agcocounterflow ket kasapulan met a pumila gapu ta addan dagiti immuna a nagpila nangruna ket “First come, first serve” ti pagannurotan dagitoy.
Agpalpalagip met daytoy kadagiti amin a turista a sumangsabay a sumurotda kadagiti pagannurotan iti trapiko iti siudad ken ti saanda a panangipilit iti kayatda.
Kabayatanna, kabaelan ti parking lot ti Diplomat Hotel a makaakomodar iti 40 agingga 45 a lugan.
Ngem tapno, masigurado a makapark iti lugan dagitoy ket maisingsingasing ti panagturongda a nasapa nangruna ket agluklukat daytoy iti alas singko ti agsapa agingga alas sais iti sardam.
